ليفربول خلص كل الإجراءات الخاصة بضم الألماني فلوريان فيرتس من باير ليفركوزن، بعد ما اجتاز الكشف الطبي بنجاح، وده بحسب شبكة سكاي سبورت.
وبحسب سكاي سبورت، فيرتز بقى رسمي لاعب في ليفربول بعد ما خلص الجزء التاني من الكشف الطبي صباح النهاردة،
وكمان مضى على عقود انضمامه للنادي لحد سنة 2030، وده معناه إن الصفقة كده خلصت بشكل نهائي.
التقارير وضّحت إن ليفربول هيعلن عن الصفقة بشكل رسمي خلال الساعات الجاية.
وكمان اتقال إن فيرتز هيسافر ألمانيا ياخدله أجازة قصيرة، وبعدها هيرجع في المعاد المحدد علشان ينضم لفترة الإعداد للموسم الجديد مع الريدز.
صحيفة بيلد الألمانية كشفت تفاصيل صفقة انتقال فيرتز لليفربول، وقالت إن قيمتها الإجمالية ممكن توصل لـ150 مليون يورو،
متقسمة كالتالي: 125 مليون يورو مبلغ ثابت، و15 مليون يورو إضافات واقعية، و10 مليون يورو إضافات صعبة التحقيق.
– مثال على كده: ليفركوزن مش هيقبض جزء من الإضافات دي إلا لو فيرتز فاز مع ليفربول بدوري أبطال أوروبا وكان ليه دور كبير في التتويج.
فيرتز هيتقاضى راتب سنوي ما بين 20 و22 مليون يورو شاملة الإضافات، و10% من الراتب ده هيروح لوالده ووالدته اللي أداروا الصفقة بالكامل لوحدهم من غير أي وكيل أو وسيط، وده خلاهم يتفادوا دفع عمولة.
فيرتز كان واحد من أهم أسباب تتويج ليفركوزن بأول لقب دوري في تاريخه موسم 2023-2024، وكمان حصل على جائزة أفضل لاعب في الدوري.
في الموسم ده، سجل 18 هدف وصنع 20، أما الموسم الحالي فجاب 16 هدف وصنع 15، لكن الفريق خسر الدوري لصالح بايرن ميونيخ بفارق 13 نقطة.
ليفركوزن كان جابه من كولن في شتاء 2020 مقابل 200 ألف يورو بس.